top of page

अस्तित्वः In Search of Existence

by Aayav Malla Thakuri

आमाको सोधनी,

पीर छ, उदासी छ

“किन तँ एकलकाँटे हुँदै छस् ?”


खुल्दुलीको आँधिबेरी भित्र

बिरानो रहरले सपना मुट्ठाई,

म मेरी आमातिर पिठ्यु फर्काई भन्छु,

“आमै ! एक्लो म हैन,

एक्लिएको त संसार हो मसंग“

म त घुलिन गएकै हो

रंग मिलेन,

म त संगै उभिनै गएको हो

उनीहरुको झैँ ढंग मिलेन ।

संसार तिमीले देखाए सरह छैन रहेछ,

भिड नै मदेखि पर पर गए

भिडबाट निक्लने म हैन !


यदि खुशी अरुलाई हराएर,

आफू जित्नु हो भने,

मलाई हराएर, सबले जितोस्।

यदि मेरा रंग बेरंग बन्दा

तिनीहरु आफू रंगिन देखिन्छन् भने

म ब्ल्याकहोल नै बनूँ !


आमा, तिमीले त यो संसार

कोमल छ भन्थ्यौ

ढुंगाले फेरी मलाई नै किन हान्छन्

म फूलले उनीहरुलाई रोक्न खोज्छु

ऐया आत्था उनीहरु नै चिच्याउँछन् !


मैले उनीहरुको बोलि बोल्न खोजिन

मैले उनीहरुको चाल हिड्न चाहिन

भिड भित्रको भिडको हिस्सा बन्दै बनिन

म उनीहरुको संसारमा अटाइन

र,

मैले मेरो संसारमा उनीहरुलाई ल्याईन !

आमा !

म एकलकाँटे हैन

एकान्किमै मेरो अस्तित्व

ब्रह्माण्ड बिशाल छ।


-आयभ मल्ल ठकुरी

न्यू योर्क, अमेरिका

0 comments

Comentarios


bottom of page