अमेरिकामा इनास राष्ट्रिय सम्मानद्वारा ११ नेपाली सम्मानित

Updated: Special: अन्तर्राष्ट्रिय नेपाली कलाकार समाज (इनास) अमेरिकाले पहिलो “इनास राष्ट्रिय सम्मान-२०२२” द्वारा अमेरिकामा कला, संगीत, साहित्य, समाजसेवा, खेलकुद र पत्रकारिता क्षेत्रमा योगदान पुर्‍याएका एघार नेपाली व्यक्तित्वहरुलाई सम्मान गरेको छ । सम्मानितहरुमा साहित्यकार होमनाथ सुबेदी, सामाजिक अभियन्ता डा. श्याम कार्की, सामाजिक अभियन्ता डा. बिष्णुमाया परियार, गायिका सपना श्री, चलचित्र निर्मात्री तथा कलाकार अनसुया श्रेष्ठ वन्त, खेलाडी बिना खड्का लामा तथा ईनेप्लिजका पत्रकारद्वय विश्वराज थापा र विजय थापा रहेकाछन् । यसैगरी, इनास प्रोत्साहन पुरस्कारद्वारा एनविसी टिभी अमेरिकाको द भ्वाइसकी प्रतियोगी परिजिता बास्तोला, भ्वाइस अफ नेपालमा सहभागी प्रनिम राई र बाल कलाकार सम्राट दाहाललाई सम्मान गरिएको छ ।

गत नोभेम्बर २६ तारिख मेरिल्याण्ड राज्यको बाल्टिमोरमा इनास अमेरिकाद्वारा आयोजित “इनास राष्ट्रिय सम्मान तथा साँस्कृतिक साँझ-२०२२” कार्यक्रममा उक्त सम्मान गरिएको हो । इनास ७० भन्दा बढी देशहरूमा विस्तारित छ ।

इनास राष्ट्रिय सम्मानद्वारा सम्मानित हुने व्यक्तित्व साहित्यकार होमनाथ सुबेदी अन्तर्राष्ट्रिय नेपाली साहित्य समाज (अनेसास) को संस्थापक अध्यक्ष हुन् ।

अर्का सम्मानित व्यक्तित्व सामाजिक अभियन्ता डा. श्याम कार्की अमेरिकामा ५० बर्ष अगाडिदेखि बस्दै आएका, नेपाली र अमेरिकी बिभिन्न संघ/ संस्थामा आबद्ध भै सेवा गरी नेतृत्व लिएका नेपाली व्यक्तित्व हुन्।

यसैगरी, अर्की सम्मानित व्यक्तित्व न्यू जर्सी राज्य निवासी सामाजिक अभियन्ता डा. बिष्णुमाया परियार काउंटीस्तरीय छ लाख जनसंख्या सेवाग्राही रहेको घरेलु हिंसा र यौन हिंसा बिरुद्ध कृयाशील संस्था हड्सन स्पिक्सकी वरिष्ठ कार्यक्रम निर्देशक र नेपालमा तथाकथित दलित, विपन्न र सिमान्तकृत समुदायका महिला र बालवालिकाहरूको निम्ति कार्यरत एड्वान संस्थाकि संस्थापक अध्यक्ष हुन्। डा. परियारको संघर्षकथा अमेरिकाको मासाचुसेट्स राज्यको शिक्षा विभागले कक्षा ७ को पाठ्यक्रममा समावेश गरी अध्यापन शुरू गरेको छ भने विश्वकै अग्रणी पाठ्यक्रम प्रकाशक म्याकग्रो हिलको “दि राईटर्स माईण्टसेट” उच्चशिक्षा पाठ्यपुस्तकमा समेत उनको जिवनी समावेश छ। डा. परियार हाल न्यू राज्य सरकारको एसियन अमेरिकन प्यासिफिक आईल्याण्डर कमिसन (एएपिआई) को कमिस्नर र जर्सी सिटी सहरको महिला आयोग र रोजगारी र तालिम समितिकि सदस्य समेत रहेकी छिन्।

यसैगरी, अर्की सम्मानित व्यक्तित्व बिना खड्का लामा दक्षिण एसियाली खेलकूदमा नेपाललाई स्वर्ण पदक दिलाउने नेपालको पूर्व उशु खेलको राष्ट्रिय खेलाडी हुन् तथा हाल अन्तराष्ट्रिय प्रशिक्षक र रेफ्री हुन् ।

यसैगरी, अर्की सम्मानित व्यक्तित्व न्यू योर्क सहर निवासी वरिष्ठ गायिका सपना श्री हुन् ।

यसैगरी, अर्की सम्मानित व्यक्तित्व बाल्टिमोर नेपाली समाज (बाना) कि पूर्व अध्यक्ष, चलचित्र निर्मात्री तथा कलाकार अनसुया श्रेष्ठ वन्त हुन् ।

यसरी नै अमेरिकाको नेपाली समुदायका गतिविधि, अमेरिकी मूलधार र विश्व समाचारलाई समेट्दै समुदायलाई सुसूचित गर्दै आएका ईनेप्लिज डट कमका दाजु-भाई पत्रकारद्वय विश्वराज थापा र विजय थापालाई सम्मान गरिएको छ । इनेप्लिजका प्रधान सम्पादक विश्वराज थापा र सम्पादक विजय थापाले समाचार सम्प्रेषण मार्फत नितन्तर, निःस्वार्थ र निःसर्त योगदान पुर्याए वापत इनास राष्ट्रिय सम्मानद्वारा कदर गरिएको हो ।

प्रमुख अतिथि इनास अन्तर्राष्ट्रियकी उपाध्यक्ष सवु गदाल कार्कीले सम्मानित हुने सबैलाई कदरपत्रद्वारा सम्मान गरेकी थिइन् । सम्मान कार्यक्रममा सम्मानित व्यक्तित्वहरूलाई दोसल्ला र रुद्राक्षको माला एनआरएनए अमेरिकाका वरिष्ठ उपाध्यक्ष कृष्णजीबी पन्थ, इनास मेरिल्याण्डका अध्यक्ष सृजन ताम्राकार, केन्टकी इनासका अध्यक्ष अर्जुन थापा, बानाका अध्यक्ष सुबोध पन्त लगायत विभिन्न समाजसेवीहरुले संयुक्त रुपमा प्रदान गरेका थिए । समारोहमा सम्मानित हुने व्यक्तित्वहरुको परिचय र उनीहरुको योगदानको चर्चा गरिएको थियो ।

समारोह नेपाली तथा अमेरिकी राष्ट्रगानबाट प्रारम्भ गरिएको थियो भने कार्यक्रम उदघाटन प्रमुख अतिथि गदाल कार्कीले गरेकी थिइन् । समारोहको आकर्षण पन्चे बाजा रहेको थियो भने प्रवेशद्वारदेखि नै पन्चे बाजा टोलीले बाजागाजा सहित कार्यक्रम स्थल प्रवेश गरेको थियो । समारोहमा इनास अमेरिका अध्यक्ष कन्हैया सिंह परियारले स्वागत मन्तब्य गरेका थिए ।

साँस्कृतिक कार्यक्रममा गायक यम बराल लगायत नेपाली कलाकारहरूद्वारा दुई दर्जन सांगीतिक कोसेलीहरु प्रस्तुत गरिएको थियो । साँस्कृतिक साँझको नौलो प्रस्तुतिको रूपमा पन्चे बाजामा दोहोरी गीतको मन्चन गरिएको थियो ।

कार्यक्रममा नेपाली नायिकाहरु ऋचा घिमिरे, अरुणा लम्साल, मेलिना मानन्धर, उषा पौडेल, सारङ्गा श्रेष्ठ, नायक मुकेश ढकाल लगायत थुप्रै कलाकारहरुको उपस्थिति रहेको थियो ।

सम्मान समारोहको संचालन इनास अमेरिकाका महासचिव राहुल केसीले गरेका थिए भने साँस्कृतिक कार्यक्रम पत्रकार सन्देश कुमार खड्काले गरेका थिए ।