Exclusive: न्यू जर्सी- अमेरिकि भूमिमा पहिलो पटक नेपाली झण्डा फहराउने एतिहासिक झण्डोत्तोलन समारोह सम्पन्न भएको छ । नेपाल र नेपालीको सम्मानको लागि न्यू जर्सी राज्यको जर्सी सिटी सहरका मेयर स्टेभन फुलपद्वारा जुन ३० तारिख 'नेपालको झण्डा फहराउने दिवस' (Nepali Flag Raising Day) को आयोजना गरी सिटी हल भवनको प्रवेशद्वारको तेश्रो तल्लामा रहेको झण्डा फहराउने पोलमा अमेरिकी झण्डासंगै नेपाली झण्डा फहराराएर झण्डोत्तोलन गरी ईतिहास रचिएको छ। मेयर फुलपसंग झण्डोत्तोलन समारोहकी अभियन्ता, नेपाली समाजकि अगुवा एवं जर्सी सिटी डाईभर्सिटी एवं इनक्लुजन बोर्डकि सल्लाहकार डा. बिश्णुमाया परियार लगायत उपस्थित नेपालीहरु सहभागी भएका थिए । जर्सी सिटी सहर नेपालको झण्डा आफ्नो अफिसियल कार्यालय भवनमा फहराउने विश्वमै पहिलो अमेरिकि सहर बनेकोछ ।
समारोहमा अमेरिकाको राश्ट्रगान मिली श्रेष्ठले प्रस्तुत गरिन् भने नेपालको राश्ट्रगान 'नेपाल अमेरिका कलाकार संघ' का कलाकारहरुद्वारा प्रस्तुत गरिएकोथियो ।
समारोहमा मेयर स्टेभन फुलप, नेपाली महावाणिज्यदूत पुष्पराज भट्टराई, जर्सी सिटी काउन्सिल वूमन एट लार्ज जोएस वाटरम्यानले सम्बोधन गरे भने जर्सी सिटी डाईभर्सिटी र ईन्क्लुजन बोर्ड सल्लाहकार डा. विश्णुमाया परियारले उद्घाटन मन्तव्य र प्रदीप परियार थापा मगरले स्वागत मन्तव्य व्यक्त गरे।
समारोहमा मेयर फुलपलाई जर्सी सिटी नेपाली समाज (जेसिएनसी) ले 'टोकन अफ लभ' प्रदान गरेको थियो भने नेपाल पर्यटन बोर्डका सद्भावनादूत सुमन बुढा मगरले मेयर फुलपलाई शान्तिका अग्रदूत गौतम बुद्धको मूर्ति प्रदान गरेका थिए । उता लङ आईल्याण्ड नेपाली समाजका निवर्तमान अध्यक्ष दुर्गेश जंग कार्कीले मेयर फुलपलाई नेपाली बहादुरीताको प्रतीकको रुपमा परम्परागत खुकुरी प्रदान गरेका थिए । सम्मानित व्यक्तित्व खगेन्द्र जिसिले सम्मान ग्रहण गर्दै मेयर फुलपलाई नेपाली टोपी पहिर्याई दिएका थिए ।
यसैबिच, मेयर फुलपले नेपालको झण्डाको झण्डोत्तोलनको अवसरमा जर्सी सिटी नेपाली कम्यूनिटी (जेसिएन) लाई समारोह सम्पन्न गर्न सहकार्य गरेको उच्च मुल्याङ्कन गर्दै सिटी प्रोक्लेमेसन पत्र प्रदान गर्दै भनेकाछन्-
"WHERE AS, the City of Jersey City is proud to recognize Nepal and the Nepali Community in Jersey City during the Nepali Flag Raising Ceremony on Friday, June 30, 2017."
मेयरफुलपले उक्त प्रोक्लेमेसन पत्रमा अगाडी भनेका छन्-
"WHERE AS, on this day, the City of Jersey City and Members of the Jersey City Nepali Community will proudly display the flags of the United States and the Nepali Flag high above City Hall in recognition of our cherished cultural diversity here in Jersey City."
समारोहमा वरिश्ठ गायक प्रकाश श्रेष्ठले गाउनु भएको नेपाली राश्ट्रभावले ओतप्रोत प्रस्तुत गीतमा बिक्की पुलामी र महिला नेत्री कन्चन बस्नेतले "यो नेपाली शीर उचाली" गीतमा नृत्य प्रस्तुत गरेका थिए:
"यो नेपाली शीर उचाली सन्सारमा लम्किन्छ
जूनकिरी झैं ज्योती बाली अन्धकारमा चम्किन्छ
चाहे झुकोस नीलो आकाश यो नेपाली झुक्दैन
चाहे रुकोस चीसो बतास यो नेपाली रुक्दैन"
त्यसैगरी, बाल कलाकार शृनिती रिजालले प्रस्तुत गरेको "डान्फे झैं नाँच्ने" नारी प्रधान गीतको नृत्यमा नेपाली चेलीहरुले आफ्नो गर्व महशुस गरे:
"डान्फेझैं नाँच्ने, हिमाल झैं हाँस्ने नेपालकि छोरी हूँ म
प्रकृतिलेनै रंग भरेकी सुकुमारी हूँ म"
यसबिच, समारोहमा मेयर स्टेभन फुलपद्वारा न्यू जर्सी निवासी ३ जना प्रतिभाशाली नेपाली व्यक्तित्वहरु वकिल खगेन्द्र जिसी, वकिल केशबराज सेढाई र युवा नेत्री एश्वर्या शर्मालाई सम्मान गरिएको छ ।
यस अघी फिलाडेल्फिया सिटी हल अगाडी प्रांगणमा सन् २०१० को नोवेम्वर १९ तारिख नेपालको झण्डा फहराईएको थियो ।
जर्सीसिटी एक मात्र अमेरिकी सहर हो जस्ले नेपालमा सन् २०१५ को अप्रिल २५ तारिख गएको महाभूकम्पबाट प्रभावित नेपाली परिवारहरुको अमेरिकामा रहेका नेपालीहरुको लागि टिपिएस (टेम्पोररी प्रोटेक्टेड स्टाटस) प्रदान गर्न अनुरोध गर्दै सिटी काउन्सिलबाट रिजोलुसन पारित गरेको थियो । सन् २०१५ को जुन २४ तारिख अमेरिकी फेडेरल सरकारको होमल्याण्ड सेक्यूरिटी डिपार्टमेण्टले नेपाललाई १८ महिनाको लागि टिपिएस स्टाटस प्रदान गरेको थियो जुन दोश्रो पटक पुन: नविकरण भैइसकेको छ । जर्सी सिटीले गत फेब्रुवरी ९ तारिख आफूलाई आप्रवासीहरुको लागि स्याङ्चुरी (सुरक्षित) सिटीको रुपमा घोशणा गरेको छ ।