top of page

प्रचण्डको प्रम पथः रवि लामिछाने उपप्रम र गृहमंत्री बनेपछि बज्दैछ भ्रष्टाचारी र विसंगतिको घण्टी

Exclusive: राष्ट्रपति विद्यादेवी भण्डारीले नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ लाई तेश्रो पटक प्रधानमन्त्री नियुक्त गरेपछि कुनै दलको पनि बहुमतको सरकार बन्न नसक्ने संवैधानिक अन्यौलताको अन्त्य भएकोछ। उता ३ जना उपप्रधानमन्त्री मध्ये उपप्रधानमन्त्री एवं सबैभन्दा शक्तिशाली मानिने गृहमन्त्री पदमा नियुक्त रवि लामिछाने भ्रष्टाचारी र विसंगतिको घण्टी बजाउने बाचाकासाथ चुनाव जितेका युवा नेता हुन्। उनी विश्वको वैभवशाली मुलुक अमेरिका कसरी सिस्टममा चल्छ र विकास कसरी हुन्छ भन्ने राम्ररी बुझेर अमेरिकाबाट सन् २०१५ को अन्तमा नेपाल फर्केका पूर्व एनआरएन पनि हुन्। रविलाई न भ्रष्टाचार गरी धन कमाउनु छ न विसंगतिलाई यथास्थितिमा रहन दिने सुविधा छ। विगत तेत्तिस वर्षदेखिका तेह्र वटा बहुदलीय सरकारहरूले औसतमा साढे दुई वर्ष सत्ता संचालन गरे तर भ्रष्टाचार र विसंगतिमा देशलाई चुलुम्म डुबाए। रविले अब देशमा देखिने गरी परिवर्तन ल्याउन र जनतालाई महशुस हुने गरी अमनचैन र न्याय दिलाउन कुनै कसुर बाँकी राख्नु हुन्न। राष्ट्र र जनताको पक्षमा काम गर्ने शक्ति, संवैधानिक पद, ल्याकत र म्यान्डेट पाएका रवि अव देशको मुहार फेर्न युद्ध मैदानमा छिरेका तर वेथिति र विसंगतिको छल, कपटरूपी चक्रव्यूहलाई तोडेर विजयी बन्नै पर्ने जनताका भरोसा र आशाका अभिमन्यु हुन्।


नवनियुक्त प्रधानमन्त्री पुष्पकमल दाहाल ‘प्रचण्ड’ ले पहिलो चरणमा ३ जना उपप्रधानमन्त्रीसहित आठ मन्त्री नियुक्त गरेकाछन्। माओवादी केन्द्रबाट २, एमालेबाट ४, राष्ट्रिय स्वतन्त्र पार्टी र जनमत पार्टीबाट १-१ जना मन्त्री बनाईएकोछ।


तीन जना उपप्रधानमन्त्रीहरूमा एमालेका उपाध्यक्ष विष्णु पौडेल उपप्रधानमन्त्री तथा अर्थ मन्त्री, माओवादी केन्द्रका वरिष्ठ उपाध्यक्ष नारायणकाजी श्रेष्ठ उपप्रधानमन्त्री तथा भौतिक पूर्वाधार मन्त्री र राष्ट्रिय स्वतन्त्र पार्टीका सभापति रवि लामिछाने उपप्रधानमन्त्री तथा गृहमन्त्री नियुक्त भएकाछन्।


त्यसैगरी, मन्त्री नियुक्त गरिएकाहरूमा जनमत पार्टीका अब्दुल खान उद्योग वाणीज्य तथा आपूर्तिमन्त्री, एमालेका तीन मन्त्रीहरू राजेन्द्र राई, ज्वालाकुमारी शाह र दामोदर भण्डारी छन्। ज्वालाकुमारी शाह पहिलो चरणको मन्त्री मण्डल गठनमा एक मात्र महिला हुन् भने आदिवासी जनजातिको प्रतिनिधित्व नारायणकाजी श्रेष्ठ र राजेन्द्र राईले गरेकाछन्। अब्दुल खानले मुस्लिम समुदायको प्रतिनिधित्व गर्दछन्। मन्त्रिमण्डलले पूर्णता नदिंदासम्म संवैधानिक व्यवस्था गरेको तेत्तिस प्रतिसत महिला प्रतिनिधित्व लगायत अन्य समुदाय र पेशाको प्रतिनिधित्व कसरी गरिेन्छ कुर्नै पर्ने हुन्छ।


प्रचण्डको नेतृत्वमा नयाँ सरकार बनाउने गठबन्धनमा एमाले, माओवादी केन्द्र, राष्ट्रिय स्वतन्त्र पार्टी, राप्रपा, नागरिक उन्मुक्ति पार्टी, जनमत पार्टी र ३ जना स्वतन्त्र सांसद छन्। नेपाली काँग्रेस पार्टीकासभापति एवं प्रधानमन्त्री शेरबहादुर देउवाले उनको नेतृत्वको सरकार गठन र गत आमनिर्वाचनका बेला प्रचण्डलगायतसंग मिलेर बनाएको गठबन्धनलाई बचाउन नसक्दा प्रचण्डले एमालेलगायत ६ दलसंग मिलेर नयाँ गठबन्धन निर्माण गरी आफू प्रधानमन्त्री बनेका हुन्।

0 comments

Commentaires


bottom of page