-प्रदीप परियार थापा
Updated: Exclusive: सयौं सक्कली नेपालीलाई अनागरिक बनाई नक्कली भुटानी शरणार्थी बनाएर मानवतस्कर गर्ने राष्ट्रद्रोही भ्रष्टाचारीहरूको जालोमा नेपाल सरकार र नेपाली प्रमुख राजनीतिक दलहरूका नैतिकहीन उच्च पदस्त नेता, तिनका निर्लज्ज नातेदार, सरकारी भ्रष्ट कर्मचारी र मानव तस्कर बिचौलिया दलालहरूको संलग्नताले मातृभूमि नेपाल र निर्दोष नेपाली जनताको शीर निहुरिएकोछ।नेपाली मुलका भुटानी शरणार्थी बनाएर तेश्रो मुलुक अमेरिकालगायतका देशमा पठाईदिन्छौं भनी ८७५ जना नेपालीहरूबाट रू. १० लाखदेखि ५०-६० लाख रूपैंया असुलउपर गरी घुस खानेहरूमा मानव तस्कर दलालहरू मात्र हैन नेपाल सरकारका पूर्व उपप्रधानमन्त्री, पूर्व मन्त्री, बहालवाला सचिव र पूर्व सुरक्षा सल्लाहकार समेतको मिलिभगत देखिएको प्रहरीको अनुसन्धानबाट खुलेको छ । नेपाल एकिकरण अभियन्ता राजा पृथ्वीनारायण शाहले सवा दुई सय वर्ष अघी उद्घोष गरेको ‘घुस दिन्या र लिन्या दुबै देशका शत्रु हुन्' भन्ने दिव्यवाणीको झन उल्टै हुर्मत लिने गरी अहिलेका भ्रष्ट नेता, तिनका आफन्तजन, परिवार र कार्यकर्ताहरूले गर्दै आएको करोडौं र अरबौं रूपैंयाको भ्रष्टाचारहरूको एकपछि अर्को पर्दाफास हुँदै गएको परिदृश्य हेर्दा नयाँ नेपाल र नेपाली जनताले थोरै भए पनि राहत पाउने र मुलुक सुशासनको बाटोतिर लम्किने आशा भने गर्न सकिन्छ। को को हुन् नक्कली भुटानी शरणार्थी प्रकरणका आरोपितहरू?
नेपाल प्रहरीका अनुसार यो गिरोहका प्रमुख नाइके केशव दुलाल र सानु भण्डारी हुन्। यि दुईले नै अन्य एजेन्टहरू नियुक्त गरी ८७५ जना नेपालीहरूबाट रू. १० लाखदेखि ५०-६० लाख रूपैंया असुल गरेकाथिए। औंसतमा रू. २५ लाख असुलेको मान्दा पनि सवा दुई अर्ब रूपैंया ति नेपालीहरूबाट रकम उठाई ठगी गरेको हिसाब निस्किन्छ । यो अरबौं रकम मध्येबाट यिनीहरूले शक्तिशाली नेता, ति नेताहरूका परिवारका सदस्यहरू र नेपाल सरकारका कर्मचारीहरूलाई मोटो रकम घुस खुवाएर आफ्नो हातमा लिई सक्कली नेपालीलाई अनागरिक र नक्कली भुटानी शरणार्थी बनाउने मानव तस्करको जालो बुनेका थिए।
र, यसरी नक्कली भुटानी शरणार्थी प्रकरणमा घुस खाएको उजुरी र प्रमाणका आधारमा प्रहरी हिरासतमा लिईएकाहरूको सूची यस्तो छः
(१) टोपबहादुर रायमाझी, पूर्व उपप्रधानमन्त्री एवं नेकपा एमाले केन्द्रीय सचिव तथा अर्घाखाँचीबाट निर्वाचित सांसद
आरोपः रू. ३ करोड घुस खाएको।
(२) बालकृष्ण खाँण, पूर्व गृहमन्त्री एवं नेपाली कांग्रेसका नेता
आरोपः रू. १ करोड २३ लाख ५० हजार घुस खाएको।
(३) टेकनारायण पाण्डे, नेपाल सरकारका बहालवाला वर्तमान प्रधानमन्त्री कार्यालय हेर्ने सचिव, तत्कालीन गृहसचिव
आरोपः रू. ५० लाख घुस खाएको।
(४) इन्द्रजित राई, तत्कालीन गृहमन्त्री एवं नेकपा एमालेका उपाध्यक्ष (पूर्व माओवादी नेता) रामबहादुर थापा मगर “बादल” का सुरक्षा सल्लाहकार
आरोपः रू. ५ करोडभन्दा बढी घुस खाएको।
(५) सन्दीप रायमाझी, पूर्व उपप्रधानमन्त्री टोपबहादुर रायमाझीका छोरा
आरोपः बैंक खातामा रू. ४० लाख भेटिएको।
(६) नरेन्द्र केसी, पूर्व गृहमन्त्री एवं नेपाली कांग्रेसका नेता बालकृष्ण खाँडका तत्कालीन प्रमुख स्वकीय सचिव, हाल ललितपुरको महांकाल गाउँपालिकाका अध्यक्ष।
आरोपः रू. ५ लाख घुस खाएको।
(७) टेकनाथ रिजाल, भुटानी शरणार्थी नेता जसलाई नेपाल सरकारले मासिक १ लाख रुपैंया तलब र ड्राइभरसहित गाडी सुविधा दिंदै आएको छ ।
आरोपः नक्कली भुटानी शरणार्थी प्रकरणका नाईके सागर थुलुङ राई, झापा, शनिश्चरे नगरपालिका, वडा नं. १० का निर्वतमान वडाध्यक्ष, नेपाली कांग्रेसका निर्वाचित क्षेत्रीय प्रतिनिधिसँग आर्थिक कारोबार (७लाख रुपैयाँ) लिएको।
(८) शमशेर मियाँ, नेपाल हज समितिका अध्यक्ष
आरोपः नक्कली भुटानी शरणार्थी प्रकरणका नाईकेहरूसंग मिलोमतो र हज समितिको गाडी गिरोहलाई प्रयोग गर्न दिएको।
(९) केशवप्रशाद दुलाल, नक्कली भुटानी शरणार्थी प्रकरणका प्रमुख नाईके
(१०) सानु भण्डारी, नक्कली भुटानी शरणार्थी प्रकरणका प्रमुख नाईके
(११) सन्देश शर्मा, नक्कली भुटानी शरणार्थी प्रकरणका नाईके
(१२) सागर थुलुङ राई, नक्कली भुटानी शरणार्थी प्रकरणका नाईके, झापा, शनिश्चरे नगरपालिका, वडा नं. १० का निर्वतमान वडाध्यक्ष, नेपाली कांग्रेसका निर्वाचित क्षेत्रीय प्रतिनिधि
(१३) टंककुमार गुरुङ, नक्कली भुटानी शरणार्थी प्रकरणका नाईके
हाल प्रहरीको पक्राउ सूचीमा फरार रहेकाहरूः
(१) प्रतीक थापा मगर, तत्कालीन गृहमन्त्री एवं नेकपा एमालेका उपाध्यक्ष (पूर्व माओवादी नेता) रामबहादुर थापा मगर “बादल” का छोरा एवं गृहमन्त्री थापाका स्वकीय सचिव
आरोपः रू. १ करोड घुस खाएको। हाल फरारः हङकङमा पुगिसकेको आशंका ।
(२) आङटावा शेर्पा, नेपाली कांग्रेसका पूर्व सांसद
आरोपः नक्कली भुटानी शरणार्थी प्रकरणका प्रमुख नाईकेहरूलाई प्रहरी हिरासतमा भेटी मिलिभगत गरेको र विदेश पठाउँछु भनी नेपालीहरूबाट रकम उठाएर ठगेको।
(३) निरज राई, तत्कालीन गृहमन्त्री एवं नेकपा एमालेका उपाध्यक्ष (पूर्व माओवादी नेता) रामबहादुर थापा मगर “बादल” का सुरक्षा सल्लाहकार इन्द्रजित राईका छोरा। हाल फरारः अमेरिकामा रहेको आशंका।
आरोपः नक्कली भुटानी शरणार्थी प्रकरणका प्रमुख नाईकेहरूसंगको मिलिभगत। उनका बुबा तत्कालीन गृहमन्त्री एवं नेकपा एमालेका उपाध्यक्ष (पूर्व माओवादी नेता) रामबहादुर थापा मगर“बादल” का सुरक्षा सल्लाहकार इन्द्रजित राई रू. ५ करोडभन्दा बढी घुस खाएको आरोपमा हाल प्रहरी हिरासतमा।
अन्य हाई प्रोफाईल आरोपितहरू (तर प्रहरीद्वारा हालसम्म पक्राउपूर्जी जारी नभएको र अनुसन्धानको दायरामा नल्याईएको) :
(१) डा. आरजु राणा, नेपाली काँग्रेसको वर्तमान समानुपातिक साँसद, नेका केन्द्रीय सदस्य, नेपाली काँग्रेस सभापति एवं पूर्वप्रधानमन्त्री शेरबहादुर देउवाकी श्रीमति
आरोपः रू. २ करोड घुस नक्कली भुटानी शरणार्थी प्रकरणमा खाएको अडियो टेप सार्वजनिक।उनीद्वारा संसदमै अडियो झुठो भएको खण्डन।
(२) मन्जु खाँड, नेपाली काँग्रेसको वर्तमान समानुपातिक साँसद, नेका केन्द्रीय सदस्य, पूर्व गृहमन्त्री एवं नेपाली कांग्रेसका नेता बालकृष्ण खाणकी श्रीमति
आरोपः रू. ६ करोड घुस नक्कली भुटानी शरणार्थी प्रकरणमा खाएको अडियो टेप सार्वजनिक।श्रीमति खाँड हाल सम्पर्क विहीन। उनका श्रीमान पूर्व गृहमन्त्री एवं नेपाली कांग्रेसका नेता बालकृष्ण खाँण हिरासतमा।
(३) रामबहादुर थापा मगर “बादल”, तत्कालीन गृहमन्त्री एवं नेकपा एमालेका वर्तमान उपाध्यक्ष (पूर्व माओवादी नेता)
आरोपः नक्कली भुटानी शरणार्थी प्रकरणमा उनका छोरा एवं आफू गृहमन्त्री छँदाका स्वकीय सचिव प्रतीक थापा मगर प्रहरीद्वारा पक्राउपूर्जी जारी तर हाल उनी फरार। प्रतीकलाई रू. १ करोड घुस खाएको आरोप। आफू गृहमन्त्री छँदाका सुरक्षा सल्लाहकार
इन्द्रजित राई रू. ५ करोडभन्दा बढी घुस खाएको आरोपमा हाल हिरासतमा।
(४) बालकृष्ण पन्थी, संयोजक, भुटानी शरणार्थी समस्याको स्थायी र दीर्घकालीन समाधानका उपायहरू पहिल्याउन गठित कार्यदल २०७६ एवं पूर्व सह-सचिव, नेपाल सरकार
आरोपः गठित कार्यदलनै नक्कली भुटानी शरणार्थी प्रमाणित गर्न बनाएको खुलासा जसको नेतृत्व गरे।
रू. २४ करोडभन्दा बढीको ठगी, १०८ जनाको उजुरी?
कान्तिपुर दैनिकको रिपोर्ट अनुसार प्रहरीका अनुसार “हालसम्म १ सय ८ जनाको उजुरी परेको छ, जसमा २४ करोडभन्दा बढी रकम उठाइएको उल्लेख छ । प्रहरीले भने यस प्रकरणमा एक अर्बभन्दा बढी असुली भएको अनुमान गरेको छ ।” स्रोतःhttps://ekantipur.com/news/2023/05/17/168428466184697105.html
भुटानी शरणार्थी कति छन्?
मैले भुटानी नेपालीहरूको मातृभूमि भुटानदेखि सन् १९९२ यता झापाको बेलडाँगीसम्मको कारूणिक यात्राको साक्षी बनेर थुप्रै रिपोर्टिंग गरेको छु।सन् २००६ देखि एक लाखभन्दा बढी भुटानी नेपालीहरूको नेपालको लामो संघर्षशील वसाईपछि अमेरिकामा पचासी प्रतिसत (८५ हजार) को सेटलमेंट भएकोछ भने बाँकी विश्वभरका पश्चिमा मुलुकहरूमा पुनर्स्थापित भएकाछन्। यद्यपि तेस्रो मुलुकहरूमा पुनर्स्थापनामा छुटेका पूर्वि नेपाल झापाको बेलडाँगी र मोरङको पथरीशनिश्चरेस्थित शिविरमा ६ हजार ५७७ नेपाली मुलका भुटानी शरणार्थीहरू अझै पनि रहेकाछन्।
भ्रष्टतन्त्रको अन्त्य कहिले हुन्छ?
विश्वका १८० देशहरू मध्ये नेपाल ११० औं भ्रष्ट मुलुक
विश्वका १८० देशहरू मध्ये खराबहरूको लहरमा नेपाल ११० औं भ्रष्ट मुलुककोरूपमा दर्ज भएकोछ।बहुदलतन्त्रको नाममा विगत तेत्तिस वर्षदेखि ब्रम्हलुटतन्र चलाएर मातृभूमि नेपाल आमालाई कंगाल बनाउँदा पनि एक रति एक सेकण्ड पनि आत्मग्लानी नहुने हाम्रा भ्रष्ट नेताहरू कस्ता? तिनै नेताहरूलाई पटकपटक चुनेर पठाउने हामी लाचारी, लाछी, विवस जनता कस्ता? ट्रान्सपारेन्सी ईन्टरनेसनलको सन्२०२२ को CORRUPTION PERCEPTIONS INDEX रिपोर्टअनुसार नेपालको भ्रष्टता अन्य मुलुकहरूसंग तुलना गरिएको हो। हुन त, भ्रष्टतन्त्र नेपालको नानीदेखिको बानी रहेछ भन्ने कुरा नेपाल एकिकरण अभियन्ता राजा पृथ्वीनारायण शाहले सवा दुई सय वर्ष अघी उद्घोष गरेको ‘घुस दिन्या रलिन्या दुबै देशका शत्रु हुन्' भन्ने दिव्यवाणीले पुष्टि गर्दछ।हामीले समुन्नत नेपालको सपनालाई साकार पार्ने हो भने भ्रष्टाचारको निर्ममतापूर्वक नियन्त्रण, न्यूनीकरण र निवारण उन्मुख कदम चाल्नै पर्दछ। कोही छ हिम्मत गर्ने?
Read details news at: https://www.nepalism.com/post/nepal-110th-corrupt-country-in-2022
भ्रष्टाचार (घुस) को असर
भ्रष्टाचार (घुस) कै कारण नेपालको विकास निर्माणको बजेट चौपट हुने गरेको छ । भ्रष्टाचार (घुस) लिने-दिने नेपाली निरिह र निकृष्ट परिपाटी यस्तरी संस्थागत भएको छ कि भ्रष्टाचार विरोधी व्यक्ति र जनताले पनि आफ्नो काम बिना कारण रोकिएपछि, ढिलाई भएर चौपट हुने भएपछि केहीसिप नलागेर घुस खुवाएरै पनि आफ्नो काम गराउनु पर्ने अवस्था छ। भ्रष्टाचारी नेता, तिनका भ्रष्ट कार्यकर्ता, हाकिम, कर्मचारी, प्रशासन संयन्त्रलाई घुस खुवाउँदा खुवाउँदा जनता वाक्क दिक्क भएकाछन्। तर राणा र पंचायतिकालमा मात्र हैन तेत्तिस वर्ष अघि पुनर्स्थापित बहुदलीय व्यवस्थापछिका हरेक नेपाली शासक र नेताहरुले पृथ्बीनारायाण शाहको दिब्यवाणीलाई लोप्पा खुँवाउँदै उल्टो भ्रष्टाचारमा चुर्लुम्म डुबेर खिल्ली उडाएको उडाएकै छन्। यो भ्रष्टतन्त्रको अन्त्य नभै देशको समृद्धि र जनताको अमनचयन कायम हुनेवाला छैन।
एक्काईसौं शताब्दीको आधुनिकता, विकास र सूचना प्रविधिको पछिल्लो चमत्कारिक दुई दशकमा नेपालले आफूलाई अत्यन्त गरीब मुलुकहरूको लहरबाट उकासेर बिकास र समृद्धिको पथमा लम्काउनु पर्नेमा एक पछि अर्को वर्ष विश्व मन्चमा भ्रष्टाचारतन्त्रमै चुर्लुम्म डुबाउँदै सर्बनाक उपस्थिति गराएकोछ।
भ्रष्टाचारको सूचीमा नेपालको विगत र वर्तमान स्ट्याण्डिंग
ट्रान्सपारेन्सी ईन्टरनेसनलको विगत १९ वर्षको CORRUPTION PERCEPTIONS INDEX रिपोर्टअनुसार सन् २००४ मा ९० औं नम्बरमा रहेको नेपाल सन् २००५ मा बदनामीतिर उक्लिदै ११७ औं नम्बरमा दर्ज भएको थियो भने सन् २००६ मा १२१ औं नम्बरमा, सन् २००७ र २००८ मा १३१ औं नम्बरमा, सन् २००९ मा १४३ औं नम्बरमा, सन् २०१० मा १४६ औं नम्बरमा, सन् २०११ मा १५४ औं नम्बरमा, सन् २०१२ मा १३९ औं नम्बरमा, सन् २०१३ मा ११६ औं नम्बरमा, सन् २०१४ मा १२६ औंनम्बरमा, सन् २०१५ मा १३० औं नम्बरमा, सन् २०१६ मा १३१ औं नम्बरमा, सन् २०१७ मा १२२ औं नम्बरमा, सन् २०१८ मा १२४ औं नम्बरमा, सन् २०१९ मा ११३ औं नम्बरमा, सन् २०२० र २०२१ मा ११७ औं नम्वरमा र सन् २०२२ मा ११० औं भ्रष्ट मुलुकहरूको लहरमा रहेको छ।
यो वार्षिक प्रतिवेदनमा नेपालको हरेक वर्ष हुने केही नम्बरको सुधार र पुनः बढोत्तरी हुने अस्थिर डाटाको अध्ययनबाट नेपालको अस्थिर राजनीतिक अवस्था यसको कारकको रूपमा लिन सकिन्छ।स्थाई र जनउत्तरदायी सरकार साथै भ्रष्टाचारीलाई कार्यवाही गर्ने कडा कानून र कार्यान्वयन गर्ने अधिकार सम्पन्न निकायको संस्थागत विकास र संस्कार नहुँदासम्म नेपाल भ्रष्टाचारको जन्जालबाट उम्किन सक्ने अवस्था आउँदैन।
छिमेकी मुलुक र विश्वका उत्कृष्ट देशहरूसंग नेपालको दाँजो
नेपालको छिमेकी मुलुकहरू भारत (ईण्डिया) ८५ औं स्थानमा रहेको छ भने चीन (चाईना) ६५ औं स्थानमा रहेको छ। यसको मतलब यि दुई छिमेकी मुलुकहरू पनि भ्रष्टाचारको मामलामा बदनाम नैछन् तर उनीहरू विश्वकै प्रभावशाली अर्थतन्त्र र द्रूत्तर विकासमा अघि बढेका मुलुकहरू हुन्। विडम्बना, नेपाल ठीक उल्टो गतिमा हिडी रहेको मुलुक हो। बरू अन्य दक्षिण एसियाली मुलुकहरू भुटान २५ औं, मालदिभ्स ८५ औं र श्रीलंका १०१ औं नम्बरमा रहेर नेपालभन्दा राम्रो सफतला प्राप्त गरेका छन्।नेपालभन्दा खराब दक्षिण एसियाली मुलुकहरूमा पाकिस्तान १४० औं नम्बरमा र बंगलादेश १४७ औं नम्बरमा छन्।
उक्त CORRUPTION PERCEPTIONS INDEX 2022 रिपोर्टअनुसार अत्यन्त कम भ्रष्टाचार हुने मुलुकहरूको सूचीमा युरोपेली मुलुक डेनमार्क पहिलो नम्बरमा रहेकोछ भने दोश्रोमा फिनल्याण्ड, तेश्रोमा न्यूजिल्याण्ड, चौंथोमा नर्वे र पाँचौंमा एसियाली मुलुक सिंगापुर रहेको छ। त्यसैगरी, छैंठौंमा स्वेडेन, सातौंमा स्विट्जर्ल्याण्ड, आठौंमा नेदरल्याण्ड, नवौंमा जर्मनी र दशौंमा आयरल्याण्ड रहेकाछन्।अन्य, हंगकंग १२ औं नम्बरमा, अष्ट्रेलिया १३ औं नम्बरमा, क्यानाडा १४ औं नम्बरमा, जापान १९ औं नम्बरमा, युके २० औं नम्बरमा, फ्रान्स २१ औं नम्बरमा, युएसए (संयुक्त राज्य अमेरिका) २४ औं नम्बरमा र साउथ कोरिया ३२ औं नम्बरमा रहेकाछन्।
विश्वमै अधिकतम भ्रष्टाचार हुने मुलुकहरूको सूचीमा सबैभन्दा अन्तिममा सोमालिया १८० औं मुलुकमा दर्ज भएकोछ। नम्बर १७९ औं मुलुकमा सिरिया, नम्बर १७८ औं मुलुकमा साउथ सुडान, नम्बर १७७ औं मुलुकमा भेनेजुएला, नम्बर १७६ औं मुलुकमा यमन, नम्बर १७५ औं मुलुकमा लिबिया, नम्बर १७४ औं मुलुकमा नर्थ कोरिया र नम्बर १७३ औं मुलुकमा हाईटी रहेको छ।
नेपालको यो नियतिको अन्त्यमा बिलम्ब नगरौं
नेपालको यो हालत नहोस पनि किन- नेपालका नेताहरुले नेपाललाई सिंगापुर र स्विईजर्ल्याण्ड बनाईदिन्छु भनेर जनतासंग भोट माग्ने तर सत्तासिन भएपछि आफू र आफ्ना आसेपासेहरुले भ्रष्टाचारगरी अकूत सम्पत्ती आर्जन गर्ने क्रम सन् १९९० मा बहुदलीय ब्यबस्थाको पुनर्स्थापना पछि झनै संस्थागत बन्न पुगेको तथ्य जगजाहेर छ । नेपालका बहुदल र समाजबादका हिमायती केही नेता र मन्त्रीहरु भ्रष्टाचारकै कारण जेल सजाय भोगिसकेको नजिर छ। अहिले पनि नेताहरुको सुखसुबिधाको आयस्रोत निदिखुदी गर्ने हो भने कुनै बैधानिक आयस्रोत नखुल्ने पक्का छ । राणा काल र पन्चायती निर्दलिय ब्यबस्थाको बेला राष्ट्रिय सम्पत्तिमा जुन ब्रम्हलूट हुन्थ्यो त्यो बहुदलको आगमनपछि बिभिन्न रुप र रंगमा यथावत कायम र बढोत्तरी रहेको छ । तर अब यसको बिना बिलम्व अन्त्य हुनु जरूरी छ।